काठमाडौं । आईसीसी क्रिकेट विश्वकप लिग–२ अन्तर्गतको त्रिकोणात्मक सिरिजमा स्कटल्यान्डले नेपालविरुद्ध २९७ रनको चुनौतीपूर्ण लक्ष्य प्रस्तुत गरेको छ।
काठमाडौंको त्रिवि क्रिकेट मैदानमा टस हारेर पहिले ब्याटिङ गरेको स्कटल्यान्डले निर्धारित ५० ओभरमा ७ विकेटको क्षतिमा २९६ रन बनायो। स्कटल्यान्डका चार्ली टियरले सर्वाधिक ८० रन बनाए। उनले ७२ बलमा १२ चौका र एक छक्का प्रहार गरे।
फिनले म्याकक्रियाथले ५५, रिची बेरिंटनले ४० र म्याथ्यू क्रसले ३९ रन बनाएर टियरलाई साथ दिएका थिए।
नेपालका लागि रिजन ढकाल, करण केसी र सोमपाल कामीले समान २–२ विकेट लिँदा सन्दीप लामिछानेले एक विकेट हात पारे।
सिरिजमा नेपालले दोस्रो खेल बुधबार नेदरल्यान्ड्ससँग खेल्नेछ। नेपालले पहिलो खेलमा यो विशाल लक्ष्य पछ्याउँदै जितको खोजी गर्नेछ।
