काठमाडौँ । पतञ्जली योगपीठको नाममा खरिद गरिएको हदबन्दी छुटको जग्गासम्बन्धी विवादमा अख्तियार दुरूपयोग अनुसन्धान आयोगले पूर्वप्रधानमन्त्री एवं नेकपा एकीकृत समाजवादीका अध्यक्ष माधवकुमार नेपालसँग बयान लिएको छ।
एक स्रोतका अनुसार अख्तियारले केही समयअघि नेपालसँग पतञ्जलीको जग्गा सम्बन्धी विषयमा बयान लिएको हो। “हदबन्दी छुटको जग्गा किनबेचबारे उहाँसँग सोधपुछ गरिएको हो,” स्रोतले बतायो।
काभ्रेपलाञ्चोकमा रहेको पतञ्जली योगपीठ तथा आयुर्वेद कम्पनीले हदबन्दी कानुनको उल्लंघन गर्दै थप जग्गा खरिद तथा बिक्री गरेको आरोपमा अख्तियारले अनुसन्धान थालेको हो। यो विषयमा प्रारम्भिक अनुसन्धान केन्द्रीय अनुसन्धान ब्युरो (सीआईबी)ले गरेको थियो। तर अख्तियारले मुद्दा हेर्न थालेपछि दोहोरो अनुसन्धान नहोस् भनेर सीआईबी पछि हटेको थियो।
माधवकुमार नेपाल प्रधानमन्त्री हुँदा—२०७६ सालमा मन्त्रिपरिषद्बाट पतञ्जलीलाई हदबन्दी छुटसहित जग्गा खरिदको स्वीकृति दिइएको थियो। तर पछिल्लो छानबिनमा छुट सीमा नाघेर अवैध रूपमा जग्गा कारोबार भएको देखिएको अख्तियारको भनाइ छ।
