विश्वकप फुटबल सुरु हुनै लाग्दा लामो समयसम्म खेलिरहेका सूचि बनाउँदा सबै भन्दा पहिले मेस्सी र रोनाल्डोको नाम आउँछ । विश्वले चिनेका यि दुई खेलाडी मात्र नभएर सन २००६ देखि नै विश्वकप खेल्न थालेको अरु दुई खेलाडीका विषयमा तपाईलाई थाह छ ?
विश्व फुटबलको सबैभन्दा ठूलो मञ्च फिफा विश्वकपमा खेल्नु नै कुनै पनि खेलाडीको सपना हुन्छ । तर केही खेलाडी यस्ता पनि छन्, जसले दुई दशकसम्म त्यो सपना निरन्तर बाँचिरहेका छन् ।
फिफा विश्वकप २०२६ का लागि छनोट भएका १ हजार २४८ खेलाडीमध्ये केवल चार खेलाडी यस्ता छन्, जसले सन् २००६ को जर्मनी विश्वकपदेखि २०२६ सम्मको यात्रा तय गरेका छन् । २० वर्षको यो अद्भुत निरन्तरताले उनीहरूलाई विश्व फुटबलका जीवित किंवदन्ती बनाएको छ।
ती चार खेलाडी हुन्— अर्जेन्टिनाका कप्तान लियोनल मेस्सी, पोर्चुगलका सुपरस्टार क्रिस्टियानो रोनाल्डो, क्रोएसियाका मिडफिल्ड जादुगर लुका मोड्रिच र मेक्सिकोका अनुभवी गोलकिपर गुइलेर्मो ओचोआ।
मेस्सी र रोनाल्डोले यसअघि भएका सबै पाँच विश्वकप खेलेका छन्। यदि उनीहरू २०२६ को विश्वकप मैदानमा उत्रिए भने लगातार छैटौं विश्वकप खेल्ने इतिहास रच्नेछन्, जुन फुटबल इतिहासकै दुर्लभ उपलब्धिमध्ये एक हुनेछ।
मोड्रिचले २००६ मा विश्वकप यात्रा सुरु गरे पनि २०१० मा क्रोएसिया छनोट हुन नसक्दा त्यो संस्करण गुमाउनुपरेको थियो। यद्यपि उनले त्यसपछि टोलीलाई २०१८ को विश्वकप फाइनलसम्म पुर्याउँदै आफ्नो महानता प्रमाणित गरे।
यता ओचोआको कथा पनि कम रोचक छैन। २००६ र २०१० विश्वकप टोलीमा परे पनि उनले मैदानमा खेल्ने अवसर पाएनन्। तर त्यसपछि मेक्सिकोका भरपर्दा गोलरक्षकका रूपमा स्थापित हुँदै उनी अहिले पनि विश्वकप टोलीको हिस्सा बनेका छन्।
यी चार खेलाडी केवल विश्वकप खेलाडी मात्र होइनन्, फुटबल इतिहासका दुई दशकलाई जोड्ने जीवित साक्षी हुन्। २००६ मा युवा प्रतिभाका रूपमा विश्वकप यात्रा थालेका उनीहरू २०२६ मा आफ्ना अन्तिम विश्वकपको सम्भावित यात्रामा छन्।
