विराटनगर । सुनसरीको इनरुवा नगरपालिका–९ बबियामा एक दम्पती घरभित्रै मृत फेला परेका छन् । आज बिहान स्थानीयले मृत भेटाएपछि प्रहरीलाई खबर गरेका थिए ।
मृत्यु हुनेमा अन्दाजी ४० वर्षीय सुकदेव शर्मा र उनकी ३२ वर्षीया पत्नी सवेता खातुन रहेका छन् । घटनास्थलमा पुगेको प्रहरी टोलीका अनुसार श्रीमानले श्रीमतीको घाँटी थिचेर हत्या गरेपछि आफूले झुन्डिएर आत्महत्या गरेको प्रारम्भिक अनुमान गरिएको छ ।
प्रहरी स्रोतले भनेको छ, “घटनास्थलको प्रकृति हेर्दा हतियार प्रयोग भएको देखिँदैन । थप विवरण अनुसन्धान र पोस्टमार्टम रिपोर्टपछि प्रष्ट हुनेछ ।”
सुकदेव घरको धुरीमा बाँसको टाटीबेरामा सारीको पासो लगाएर झुन्डिएको अवस्थामा भेटिएका थिए भने सवेता ओछ्यानमै मृत अवस्थामा भेटिइन् । घटनास्थलमा डिएसपी योगराज खतिवडा नेतृत्वको टोली पुगेको थियो । कानुनी प्रक्रिया पूरा गरेर दुवैको शव पोस्टमार्टमका लागि बीपी कोइराला स्वास्थ्य विज्ञान प्रतिष्ठान, धरान पठाइएको प्रहरीले जनाएको छ ।
सवेताका आफन्त भने अहिलेसम्म प्रहरीको सम्पर्कमा आएका छैनन्। आफन्त आएपछि मात्रै शवको पोस्मार्टम गरिने भएको छ। प्रहरीले सवेताले पनि सुकदेवसँग दोस्रो बिहे गरेको र उनी सुकदेवकी कान्छी पत्नी रहेको जनाएको छ।
सुनसरीका प्रहरी प्रमुख एसपी सुमनकुमार तिम्सिनाले घटनाबारे थप अनुसन्धान भइरहेको जानकारी दिनुभयो। घटनास्थल जिल्ला प्रहरी कार्यालय सुनसरीबाट करिब तीन किलोमिटर पूर्व पर्छ।
