काठमाडौं । नेपाल–चीनको सिमानामा पर्ने रसुवाको ल्हेन्दे खोलामा गए राति आएको भीषण बाढीले नेपाल चीन जोड्ने मितेरी पुल बगाएपछि दुई देशको सम्पर्क टुटेको छ ।
अहिलेसम्म बाढीले गरेको क्षतिको यकिन विवरण नआएपनि मितेरी पुल भने पुरै बगाएको र नेपाल चीन सम्पर्क विच्छेद भएको रसुवाका प्रमुख जिल्ला अधिकारी अर्जुन पौडेलले बताए । भन्सारको यार्डमा जाँचपासका लागि राखेका सबै इभी पनि बगाएको उनले बताए ।
मानवीय क्षतिको यकिन विवरण नआए पनि जलविद्युत आयोजनाका सामानहरु बगाएको उनले बताए । पार्किङमा राखेका गाडीमा कामदारहरु सुत्ने भएका कारण मान्छेहरु बगेको हुनसक्ने आशंका भएपनि विवरण संकलनको काम भइरहेका उनले बताए ।
उद्धारका लागि प्रहरीको टोली गएपनि पानीको सतह नघटेका कारण अहिले त्यहाँ पुग्न सकेको छैन । उनका अनुसार १२ जनाको प्रहरी टोली त्यहाँ नै फसेको छ ।
अहिले नेपाली सेनासँग समन्वय गरेर हेलिमार्फत उद्धारका लागि छलफल भइरहेको उनले बताए ।
