विराटनगर । भदौ २४ गते भएको ‘जेनजी आन्दोलन’का क्रममा सरकारी कार्यालयहरूमा तोडफोड तथा आगजनीमा संलग्न भएको आरोपमा प्रहरीले पाँच जनालाई पक्राउ गरेको छ। मोरङ प्रहरीले आइतबार साँझ आवास पौडेल, अरुण साह, राजीव यादव, महेश नेपाल र ताजिम अन्सारीलाई पक्राउ गरेको डिएसपी हरिनन्दन चौधरीले जानकारी दिए।
प्रहरीका अनुसार पक्राउ परेकाहरू विभिन्न राजनीतिक दलसँग आबद्ध कार्यकर्ता हुन्। पौडेल नेपाली कांग्रेस, साह नेकपा ९एमाले०, अन्सारी तत्कालीन माओवादी निकट रहेको प्रारम्भिक अनुसन्धानमा खुलेको स्रोतले जनाएको छ।
पक्राउ परेकाहरूलाई जिल्ला प्रहरी कार्यालय मोरङको हिरासतमा राखिएको छ। उनीहरूमाथि ‘अपराधिक उपद्रव’ मुद्दा दर्ता गर्ने तयारी भएको प्रहरी जनाएको छ। सोमबार मोरङ जिल्ला अदालतमा पेश गरी म्याद थपका लागि प्रक्रिया अघि बढाइनेछ।
भदौ २४ गतेको आन्दोलनका क्रममा आगजनी र तोडफोड गर्नेहरूको सूची प्रहरीले पहिले नै तयार पारेको थियो। घटनास्थलका फोटो तथा भिडियोको आधारमा पहिचान गर्दै प्रहरीले पक्राउ अभियान सञ्चालन गरिरहेको बताइएको छ। यसअघि पनि प्रहरी चौकी र सवारी साधनमा आगजनी गरेको आरोपमा २१ जनालाई पक्राउ गरी अनुसन्धान चलाइएको छ।
